Wednesday, 11 November 2020 09:57

Rason sa ‘time-based recovery’ gitin-aw sa DOH-10

Written by CDO COVID19 Response Team
Rason sa ‘time-based recovery’ gitin-aw sa DOH-10 Photos by Aicy Soriano
GITATAW ni Dr. Ian Christian Gonzales, Infectious Diseases Cluster Head – Department of Health Northern Mindanao ngadto sa mga punong barangay sa Cagayan de Oro nga ang ‘incubation period’ ug ‘infectious period’ sa coronavirus disease ang gibasihan sa pagpatuman sa bag-ong ‘time-based recovery’ protocol atol sa gipahigayong community engagement kagahapon, Nobyembre 10.
 
Gipasabot ni Dr. Gonzales nga ang 'incubation period' mao ang panahon nga natakdan ang usa ka tawo sa COVID-19 hangtod mogawas ang sintomas sulod sa 2 ngadto 14 ka adlaw.
 
Samtang ang 'infectious period' mao ang panahon kanus-a ang usa ka COVID-19 infected person makatakod sa ubang tawo diin subay gihapon sa pagtuon ang virus molungtad nga buhi ug 'infectious' sulod sa lawas sa usa ka tawo anaa lang sa 9 ka adlaw.
 
Giklaro ni Dr. Gonzales nga bisan pa man dili na mag 're-swab' o repeat (RT-PCR) reverse transcriptase polymerase chain reaction test ang usa ka confirmed COVID-19 positive, mahimo na kining i-certify nga 'recovered' ug 'not infectious' kung pasado kini sa criteria o’ conditions sama sa complete isolation period ug wala nay sintomas.
 
Nagtuo si Dr. Gonzales nga importante nga masabtan sa mga barangay officials ang bag-ong protocol sa pagdeklara sa usa ka tawong recovered' ug 'discharged' alang sa hapsay ug paspas nga 'reintegration' o pagbalik sa komunidad human ang 10 days isolation period ug wala na'y gipakitang sintomas sulod sa 3 ka adlaw.
 
Sa laing bahin, nagpasalamat usab si Dr. Lorraine Nery, acting city health officer sa aktibong partisipasyon sa matag barangay sa gihimong community engagement kagahapon kauban ang DOH-10, Cagayan de City Police Office ug CHO.
 
Gidayeg usab ni Dr. Nery ang walay puas nga suporta sa barangay ilabina sa pakigbatok sa COVID-19 sa syudad ug pag-abag sa (PDITR) strategy kon Prevent-Detect-Isolate-Treat-Reintegrate.
 
Lakip sa mitambong sa aktibidad si city epidemiologist Dr. Teodulfo Joselito Retuya; Dr. David Mendoza, DOH-10 Assistant Regional Director; Health Education and Promotions Officer Aian Caridad; Dr. Maria Ellen Santua, COCPO – Deputy Director for Operations; LtCol Lemuel Gonda, ug CHO-HEPO Rowena Yu.