Friday, 06 November 2020 14:33

Kapitanes sa Oro pasabton kalabot sa ‘time-based recovery’

Written by CDO COVID19 Response Team
Kapitanes sa Oro pasabton kalabot sa ‘time-based recovery’ Photo by Roel Felicitas

GIKONPIRMA ni Dr. Teodulfo Joselito Retuya, city epidemiologist, nga maghatag sila og orientation sa mga barangay kapitan sa Cagayan de Oro kabahin sa 'time-based' COVID19 recovery karong Nobyembre 10 ning tuig.

Sumala ni Dr. Retuya mohatag og technical assistance ang Department of Health Region 10 sa City Health Office sa pagpasabot sa mga kapitanes kabahin sa istratehiya sa DOH kalabot sa time-based recovery, diin usa sa speaker si Dr. Ian Christian Gonzales, hepe sa Infectious Diseases Cluster sa DOH-10.

Subay sa 'time-based' recovery, dili na kinahanglan nga ipaubos sa second swab o’ repeat real time reverse transcriptase polymerase chain reaction (RT-PCR) test ang usa ka confirmed COVID-19 positive ug mahimo nang ideklara nga 'recovered' kung natapos na ang required nga isolation period ug wala nay sintomas.

Apan giklaro ni Dr. Retuya nga sa pagkakaron wala pa hingpit nga gipatuman kini sa syudad. Gani, kagahapong adlawa natala ang pinakataas nga recoveries sa syudad nga anaa sa 68 diin pulos kini nag-negatibo sa repeat RT-PCR test ug dili 'time-based' recoveries.