Tuesday, 03 November 2020 15:39

Kaso sa acute respiratory illness sa syudad mikunhod

Written by CDO COVID19 Response Team
Kaso sa acute respiratory illness sa syudad mikunhod Photo Roel Felicitas

BISAN pa man sa nagkataas nga ihap sa COVID 19 sa syudad, gipasabot ni City Health Officer Dr Lorraine Nery nga mas ubos ang ilang natala nga acute respiratory illness (ARI) nga usa sa mga sintomas sa corona virus nga sarang usab hinungdan sa COVID 19.

Base sa taho sa City Health Office (CHO) mas ubos ang ilang natala nga ARI deaths nga anaa sa 681 karong tuiga kompara sa milabay’ng tuig nga 1,293.

Gipasabot ni Dr Nery nga bisan kun ang maong datus natala sugod Enero hangtud Oktubre pa lamang apan kompyansa ang CHO nga dili na niini maabot ang gidaghanon sa 2019.

Matud ni Dr. Nery nga daghan usab ang midangop karon sa online consultation sa CHO human kini gilusad niadtong Abril 22 ning tuiga sa tinguha nga maatiman gilayon ang mga adunay balatian bisan pa man sa hulga sa COVID 19 nga nakahatag og kabalaka ug kalisdanan sa mga buot magpakonsulta sa mga hospital.

Apan bisan pa man niini, nanawagan ang mga doctor sa katawhan nga magpa konsulta gilayon pinaagi sa online consultation kung adunay mga balatian.