Tuesday, 17 March 2020 10:10

Duha ka internet cafes nga misupak sa kamanduan ni Mayor Moreno sa temporaryong pagsira gumikan sa bahad sa COVID 19, nasampulan

Written by

NASAMPULAN karon sa CDO-Regulatory Compliance Board kon RCB ang duha ka peso/internet cafes sa Barangay 26 ug 35 ning syudad human misupak sa kamanduan ni City Mayor Oscar S. Moreno pinaagi sa E.O 048-2020 o temporaryong pagsira sa internet ug gaming shops gumikan sa bahad sa COVID 19.

Atol sa gipahigayong surprise inspection sa hiniusang pwersa sa RCB pinanguluhan ni Antonio Resma Jr., inspectorate team leader sa RCB, kauban ang personahe sa City Social Welfare and Development (CSWD) ug Cagayan de Oro City Police Office (COCPO), gi-isyuhan og Official Violation Report (OVR) ang usa ka internet cafe sa Brgy 26.

Gawas pa kini sa kalapasan nga walay business permit ang 12 units nga peso net ug wala naka 'lock' ang 'porn site'.

Sa laing bahin, laing internet cafe usab sa Barangay 35 ang na-isyuhan og OVR sa kalapasan sa E.O 048-2020.

Sa kinatibuk-an, 15 ka mga menor de edad ang malampusong na-rescue sa nasangpit nga mga internet cafes. Ang inspection subay sa taho nga nadawat sa buhatan.

Gipanawagan karon ni Resma ang hugot nga kooperasyon sa Barangay Council for Protection of Children (BCPC) nga mo-koordinar sa COCPO alang sa implementasyon sa E.O 048-2020.

 

By Archie Pagayaman / photo by Reynan Baylin