Tuesday, 17 March 2020 10:06

Mga oportunistang establisemento mag-atubang og tukmang kaso subay sa Consumer Act - CPCC

Written by

GIBUTYAG karon ni Atty. Jose Edgardo’ Egay’ Uy, Co-chair sa City Price Coordinating Council (CPCC), nga manubag ang mga patigayon ug establisemento nga mapamatud-ang nag-'overpriced', nag-'hoard' sa alcohol, face masks ug uban pang produkto taliwala sa giatubang nga COVID 19 sa tibuok kalibutan.

Kini ang gipadayag ni Atty. Uy human sa gipahigayong random ug surprise monitoring sa presyo ug supply sa nasangpit nga batakang palaliton sa mga tindahan, pharmacies, ug warehouses sa Carmen, Divisoria, Cogon, Lapasan ug CM Recto Highway areas.

Ang CPCC maoy nangulo sa Joint Monitoring & Enforcement Team diin gilangkuban kini sa mga representante sa Department of Trade and Industry pinangulohan ni OIC Provincial Director Almer R. Masillones, uban sa representante sa Food and Drug Administration (FDA), Criminal Investigation and Detection Group, Cagayan de Oro City Police Office, National Bureau of Investigation, ug uban pa.

Anaa usab si Kagawad George Goking, ang chairman sa Committee on Trade and Commerce sa konseho. Tumong niini nga matino kung insakto pa ang supply ug kung mituman ba ang mga patigayon sa kamanduan nga ‘price freeze’ sa batakang palaliton ug essential emergency medicines and supplies nunot sa Presidential Proclamation 922 kon deklarasyon sa ‘state of public health emergency’ sa nasod gumikan sa bahad sa COVID 19 disease.

"Kung makita nga naay violation, then I would suggest nga i-pursue ang unsang angay buhaton to make them liable kay dili kini ordinary time, kinahanglan subayon tanan, dili pwede oportunista dinhi kay lisod ang panahon, tanan gusto magpalit sa item nga scarce, ubos na ang supply, mahal pa, di pa gyud tinuod nga item ang gibutang sa resibo", saysay ni Atty. Uy.

Gipadayag ni Atty Uy nga adunay nasapon sa akto nga usa ka tindahan nga gapamaligya og alcohol nga wala nakasubay sa gitakdang price range.

Giangkon usab niini nga adunay pag-ubos sa supply sa nasangpit nga produkto, busa padayon ang pahimangno sa katawhan nga mahimong responsableng konsumante, dili mag-kompra og dinaghan ug ipatuman ang 'equitable distribution' aron ma-apod ang tanan.

Gisuguro usab niini nga atol sa panagtagbo sa mga suppliers, giduso nga paspasan ang delivery taliwala nga aduna usab kalisdanan sa 'mobility' gumikan sa ubang areas nga nag-deklara og lockdown tungod sa COVID 19.

 

By Archie Pagayaman / photo by Reynan Baylin