Wednesday, 16 September 2020 16:49

Multa nga P2,000 ipahamtang sa dili maggamit og face mask, pagsunod sa social distancing sugod Okt 5.

Written by CDO COVID19 Response Team
Multa nga P2,000 ipahamtang sa dili maggamit og face mask, pagsunod sa social distancing sugod Okt 5. Photos by Reynan Baylin

MULTA nga dos mil (P2,000) ang ipahamtang sa mga indibidwal nga dili mag-face mask ug mosupak sa social distancing protocols sugod karong Oktubre 5, 2020. Basi kini sa City Ordinance No. 13946-2020 nga gipangamahan nila ni Kagawad Romeo Calizo ug Maria Lourdes Gaane.

Gipasabot ni Kagawad Gaane nga taliwala sa mga paningkamot sa syudad, daghan gihapon ang mga malapason ug kini nakita usab sa Department of Interior and Local Government (DILG) nga mao usab ang nagsugyot nga angay magpatuman ang mga local government units (LGUs) og mas bug-at nga silot alang sa mga malapason sa health protocols.

Gani, ang unang gisugyot nga multa mobalor og P5,000 ug pagka-priso sulod sa usa ka tuig, apan gisupak kini sa pipila ka mga kagawad tungod kay bug-at ra, hinungdan nga gipaubsan sa P2,000 ug pagka-priso sulod sa 15 ka adlaw.

Hinuon, gipadayag ni Kag. Gaane nga anaa gihapon ang otso (8) oras nga community service kon balor P500.

Sa iyang bahin, si Kag. Calizo nagkanayon nga ang disiplina mao na lamang ang bugtong hinagiban aron pakigbatokan ug masumpo ang pagkuyanap sa COVID.

“Kung dili nimo kaya sundon kini nga mga protocols, ayaw paggawas,” dugang ni Calizo.

Panawagan sa duha ka mga opisyal ngadto sa katawhan aron dili mamultahan, siguradohon nga nakasul-ob og face mask ug mag-obserbar sa physical distancing kung anaa sa mga pampublikong lugar.